Al lej, illas muntagnas, adüna cun vent
Silvaplauna es situo immez la cuntredgia da lejs da l'Engiadin'Ota e celebrescha il vent da Malögia culs sports nautics ils pü actuels e sia muntagna da chesa «Corvatsch» cul restorant panoramic il pü ot da las Alps Orientelas.
Perque dess Ella/El gnir a ster a Silvaplauna:
Ella/El es be fö e flamma pel sport? Nus essans Sieu hotspot. Windsurfing da sted, sport da naiv d'inviern – quecò sun be duos exaimpels da nossa granda spüerta a Silvaplauna.
Ella/El ama la natüra? Il panorama alpin impreschiunant e nossa cuntredgia da lejs incumparabla L'inchantaron.
Nus essans attractivs per famiglias. L'instrucziun scolastica in rumauntsch resguarda la tradiziun ed es integreda in structuras da scoula orientedas vers l'avegnir ed in üna spüerta multifaria per noss iffaunts.
La vschinauncha politica da Silvaplauna consista daspö la spartiziun territoriela l’an 1538 da Silvaplauna e las fracziuns Surlej e Champfèr cun Albana. Silvaplauna vain documento per la prüma vouta dal 1288. Già quella vouta vain rapporto d’üna fusiun cun «Surleich» e «Chiamfer». Que es prubabelmaing il cumanzamaint da la colliaziun definitiva cullas duos fracziuns Surlej e Champfèr. Scu cunfin traunter San Murezzan e Silvaplauna vain determino da quel temp l'Ova da Suvretta. Cotres es Champfèr hoz trapartieu politicamaing.
A Silvaplana vain discurrieu rumauntsch puter. Uschè es eir la lingua d'instrucziun fin e cun la terza classa rumauntsch. Pervi dal grand augmaint da la populaziun (bgeras famiglias d'otra lingua) es la populaziun rumauntscha uossa illa minurited. La Confederaziun e'l Chantun faun però grands sforzs per mantgnair la lingua rumauntscha.
