Senioras e seniors
Vuless Ella rester activa/El rester activ eir zieva la vita professiunela? Ho Ella/El üna dumanda davart l'organisaziun da la vita ill'eted avanzeda? U es Ella/El in tschercha d'üna soluziun d'abiter adatteda a l'eted? Silvaplauna es üna vschinauncha attractiva per glieud attempeda. Ella/El chatta in seguit tuot las infurmaziuns cha's drouva per mner eir scu seniora u senior üna vita satisfacenta a Silvaplauna.
Proget da generaziuns
Scu seniora u senior a Silvaplauna ho Ella/El la pussibilted da's parteciper activmaing al proget da generaziuns. Üna cumischiun metta insembel eir per Ella/El ün program vario, scu per exaimpel la maisa da gianter u inscunters sociels cun giuven e vegl.
Per ch'Ella/El as possa mouver sgür e sainza retgnentschas ill'eted avanzeda, vainsa – sper bgeras sendas per ir a spass – installo aposta per Ella/El üna plazza da giuver da generaziuns illa Via Munterots. Nus La/Al giavüschains bun divertimaint!
Centers d'attempos
Nu's sainta Ella/El pü sgür/-a a chesa? S'interessa Ella/El per l'abiter assistieu u residenzas d'attempos? In Engiadin'Ota do que il center d'attempos Promulins a Samedan. Scu spüerta cumplementera do que in Bergiaglia il Centro Sanitario Flin, a Scuol il Center da sandà Engiadina Bassa, illa Val Müstair il Center da Sandà Val Müstair.
Il Post da cussagliaziun per l'eted avanzeda e la sandet in Engiadin'Ota La/Al cussaglia illas dumandas multifarias in connex cul tema 'gnir pü vegl'.
