Prestaziuns da sustegn
La vschinauncha da Silvaplauna ho üna cumischiun sociela chi s'occupa da las seguaintas fatschendas:
prüm agüd finanziel (investir al dret lö ils raps avaunt maun)
contact cun organisaziuns d'agüd/posts da cussagliaziun
persuna da contact per agir concretamaing mantgnand l'obligaziun da discreziun
Per dumandas generelas u dumandas per prestaziuns socielas as po Ella/El drizzer directamaing al servezzan sociel regiunel d'Engiadin'Ota-Bergiaglia:
Fond Prager
La vschinauncha dispuona dal Fond Prager. Il chapitêl e'l richev dal fond paun gnir druvos be per contribuziuns a favur d'iffaunts da Silvaplauna ourdvart talentos, e que a partir dal cumanzamaint dal dovair d'ir a scoula fin al 25evel an da vita accumplieu. Pussiblas sun per exaimpel contribuziuns per:
scolaziun e perfecziunamaint i'l champ scolastic u professiunel
sustegn per üna scolaziun sportiva u culturela
progets da scoula culturels u sportivs
Ils mezs dal fond nu paun gnir druvos per deliberer instanzas pertuchedas da lur oblig leghel, per exaimpel sgüraunzas, paraints oblios da sustgnair u la vschinauncha.
Dumandas per contribuziuns paun gnir inoltredas dad iffaunts e giuvenils indigens chi sun activs in ün cader surregiunel.
Las contribuziuns sun liedas a l'intent. Perque as po fer dumandas be per l'an curraint (na retroactiv). Culla dumanda ho da gnir inoltro ün preventiv detaglio.
Fond Kilcher
La vschinauncha dispuona dal Fond Kilcher. Ils raps da quist fond paun gnir druvos per las seguaintas contribuziuns:
per abitantas ed abitants da Silvaplauna chi drouvan sustegn u agüd d'urgenza pervi da mendas da l'eted, consequenzas d'ün accidaint u pervi d'üna malatia
per persunas chi survegnan l'incumbenza da la cumischiun sociela da sustgnair, assister, güder u accumplir üna lezcha sumgiainta i'l sen dal punct precedaint
per instituziuns, persunas u societeds chi assistan a chesa ad abitantas u abitants da Silvaplauna chi haun dabsögn da sustegn
pel champ da prevenziun
Ils mezs nu paun gnir druvos per deliberer da lur obligs leghels las autoriteds, las sgüraunzas u ils paraints oblios da sustgnair.
Fundaziun BPO
La Fondazione BPO ho garantieu a la vschinauncha da Silvaplauna üna contribuziun/donaziun pel sustegn da persunas in bsögn a Silvaplauna. Dumandas – eir da commembers da la cumischiun sociela – vegnan trattedas da la gestiun. Sch'üna dumanda vain refüseda a la tschanteda da la gestiun, po üna commembra u ün commember da la gestiun fer la proposta da preschanter la fatschenda a la suprastanza, per cha quella decida in merit. Las dumandas nu stöglian gnir inoltredas da las persunas pertuchedas. La gestiun stu examiner las relaziuns finanzielas.
Ün agüd d'urgenza po gnir concess per eviter cha abitantas u abitants in bsögn rivan in imbarraz finanziel u persunel pervi dad expensas temporeras. L'agüd d'urgenza nu vain per regla pajo a l'abitanta u a l'abitant, dimpersè directamaing a la creditura u al creditur.
Dumandas
Dumandas per sustegns da tuot gener sun d'inoltrer in scrit culla documainta necessaria a la chanzlia cumünela e vegnan, scha bsögn fo, preschantedas a la suprastanza cumünela.
