Seguonda abitaziun
Posseda Ella/El üna seguonda abitaziun a Silvaplauna? Cò chatta Ella/El tuot las infurmaziuns necessarias.
Aperitiv d'inscunter
Duos voutas l'an organiseschan la vschinauncha da Silvaplauna e Silvaplauna Turissem ün aperitiv d'inscunter per indigens, seguondindigens e giasts. L'occurrenza dess spordscher la pussibilted da s'imprender a cugnuoscher e da der üna baderleda e dess promouver il spiert da cumünaunza in nos lö da domicil e da vacanzas Silvaplauna, Surlej e Champfèr. Ella/El survgniro ün invid a temp ütil.
Restituziun da l'abunamaint da skis
L'ENGADINcard 365 es il nouv abunamaint annuel per giasts da las telefericas d'Engiadin'Ota cun pussibilted da prolungiamaint automatic. Ella rimplazza l'Engadin Pass e po gnir cumpreda tuot an i'l shop da vacanzas da la regiun da vacanzas Engiadina San Murezzan u düraunt las uras d'avertüra tar las cassas da las telefericas. L'abunamaint es valabel per 365 dis a partir da la data da cumpra.
Scu possessura u possessur d'üna seguonda abitaziun survain Ella/El fin l'an 2024 üna restituziun da 10% dal predsch da cumpra. Nouv spordschains nus da restituir ils raps cun ün pajamaint sün Sieu conto. Per pudair fer que, druvainsa la seguainta documainta:
quittaunza originela da Sieu abunamaint annuel
indicaziuns davart Sieu conto da banca (IBAN, possessura u possessur dal conto e nom da la banca)
copcha da la carta d'identited da la possessura u'l possessur da l'abunamaint
copcha da la carta d'identited dad iffaunts suot 18 ans
contrat da fittaunza tar fittaunza annuela d'üna seguonda abitaziun e declaraziun da renunzcha da la proprietaria u'l proprietari
Tar persunas giuridicas passa Ella/El scu proprietaria u proprietari da l'abitaziun culla glista da legitimaziun (extrat da protocol dal gremi da survagliaunza u sumgiaint) tar l'administraziun cumünela.
Persunas cun dret da pretaisa sun:
Proprietarias e proprietaris
proprietarias u proprietaris (proprieted exclusiva u conproprieted) tenor il cudesch fundiari e lur partenari u partenaria
tuot ils iffaunts suot 18 ans da proprietarias u proprietaris e/u lur partenari u partenaria
Persunas giuridicas
üna reducziun per staunza tenor il cudesch fundiari/stimaziun ufficiela
Fittadinas e fittadins da tuot an
tuot las fittadinas e'ls fittadins d'üna abitaziun secundara cun ün contrat annuel
Pel pajamaint direct a la cassa dal fnestrigl principel da la vschinauncha velan las listessas cundiziuns scu tar ün pajamaint da banca. Sainza la documainta cumpletta e las indicaziuns davart la possessura u'l possessur da l'abunamaint nu vegnan pajedas üngünas restituziuns.
