Na be la cuntredgia intuorn Silvaplauna spordscha ün purtret unic. Eir illa vschinauncha, chi ho fat tres grands müdamaints düraunt ils ultims ans, as po vzair üna pruna.
Il center vegl dal lö
Il center vegl da Silvaplauna
La Via Veglia i'l center vegl da Silvaplauna es circundeda da chesas engiadinaisas veglias. Ils edifizis ornos cun sgrafits quintan ün'istorgia interessanta e guardan inavous sül temp, cur cha Silvaplauna d'eira auncha üna dretta vschinauncha da pass. Sün bgeras chesas as chatta inscripziuns rumauntschas.
Daspö l'an 1556 es la vschinauncha da Silvaplauna protestanta. Sül territori da Silvaplauna as chatta trais baselgias da differents temps. Sper las baselgias evangelicas Santa Maria e San Rochus exista daspö il 1964 la baselgia catolica Sant'Anna.
Chastè Crap da Sass
Sülla planüra a Surlej survaglia il Chastè Crap da Sass il Lej da Silvaplauna. L'edifizi imposant es gnieu fabricho intuorn il 1906 dal generel A. von der Lippe da la Germania. Ils craps chi sun gnieus druvos pel fabricat derivan per granda part da la regiun Crest'Alta. Dal 1928 ho Hugo Prager cumpro il chastè per il druver scu dmura. Aunch'hoz es il chastè in possess da la famiglia Prager e nu sto a disposiziun al public.
Il crap da Nietzsche
«Tar ün bloc imposant a fuorma da piramida poch dalöntsch da Surlej d'he eau fat üna posa. Alura m'es quist impissamaint saglieu in testa.» («Bei einem mächtigen pyramidal aufgetürmten Block unweit Surlej machte ich Halt. Da kam mir dieser Gedanke.»)
La sted 1879 es Friedrich Nietzsche gnieu per la prüma vouta in Engiadina. In seguit ho el passanto las steds dal 1881 al 1888 a Segl. In quist temp as pudaiva observer, cu ch'el tschantaiva sün quist crap a la riva dal Lej da Silvaplauna e faiva sias ponderaziuns. Traunter oter l'es gnieu adimmaint cò l'ideja dal retuorn etern – la concepziun fundamentela da sieu chodouvra litterar «Also sprach Zarathustra».
La cascada «Ova dal Sagl»
La cascada artificiela cunter ovazuns: Dal 1793 es Surlej gnieu desdrüt per part d'ün'ovazun. Dal 1873 s'ho perque fabricho ün tunnel cun üna lungezza dad 80 m ed ün diameter da 3 m per condür l'Ova da Surlej tres il grip tar la cascada. La cascada vain eir numneda «Ova dal Tunnel» u «Ova da Surlej».
Cun «Silvaplana Explorer» as muossa Silvaplauna da sia vart la pü multifaria. Ses puncts panoramics e lur sendas circuleras faun cuvaida d'ir ad explorer ils contuorns. Mincha punct panoramic quinta sia egna istorgia. Uschè per exaimpel il punct panoramic «Fratta» chi's rechatta immez il God Fratta. Da pü bod passaivan ils Romauns sün lur sendas tres quist god e laschaivan inavous lur stizis.
Chi chi guarda insü tar la cascada, vezza forsa il tunnel, tres il quêl culan las massas d’ova enormas. Ch'Ella/El giaja tal punct panoramic per gnir a savair dapü davart quist tunnel e davart l'istorgia da Silvaplauna.
