Provedimaint d'ova ed alluntanamaint da l'ova persa
Silvaplauna es üna da las vschinaunchas in Grischun cun fich bger'ova. Dapertuot sül territori cumünel ho que funtaunas grandas e pü pitschnas chi mainan ova tuot an. Püssas funtaunas productivas sun gnidas inchaschedas, uschè cha tuot ils edifizis sül territori cumünel vegnan provists cun ova da funtauna fras-cha.
La prüma funtauna cha Silvaplauna ho nüzzagio as rechattaiva sur la vschinauncha tar la sortida dal Vallun in vicinanza da l'implaunt electric. L'ova es gnida condütta dal 1848 cun büschens da lain da la funtauna fin giò tal prüm bügl da lain in vschinauncha. Quel as rechattaiva sülla plazza cumünela davaunt l'Hotel Müller (hoz Chesa da la Posta).
