A la votaziun a l'urna da dumengia 27 settember 2026, vain vuscho giò cocernent las quatter cunvegnas da prestaziun (Ospidel, Centers d'attmpos, Spitex, Sanadura) per ils ans 2027 fin 2029.

Daspö ils 1. avrigl 2026 es la Sanadura respunsabla pel provedimaint da sandet in Engiadin’Ota. Ella gestiunescha ils centers d’attempos Promulins a Samedan e Du Lac a San Murezzan scu eir la Spitex.

Ultra da que garantescha la Sanadura ulteriuras prestaziuns importantas tres contrats da servezzan. Lotiers tuochan l’Ospidel d’Engiadin’Ota a Samedan chi vain gestiuno da la Ospidel d’Engiadin’Ota SA scu eir il post da cussagliaziun Vegldüna + Sandet chi vain mno da la Pro Senectute Grischun.

La prümavaira dal 2026 haun appruvo tuot las vschinaunchas da la regiun da provedimaint da sandet Engiadin’Ota (vschinaunchas RPSEO) la ledscha davart la constituziun da la Sanadura. Al listess mumaint haun ellas garantieu la finanziaziun da las differentas parts da la gestiun per la düreda dals 1. avrigl fin als 31 december 2026.

Zieva il start da la gestiun e la constituziun dals organs da la Sanadura as tratta que uossa da garantir a lungia vista la finanziaziun dal provedimaint da sandet in Engiadin’Ota. In quist connex Als suottametta il cussagl da sandet da la Sanadura quatter cunvegnas da prestaziun pels ans 2027 fin 2029 per la votaziun.

Las votaziuns vegnan fattas per la prüma vouta tenor il möd da votaziun fixo illa ledscha da Sanadura. Il cussagl da sandet suottametta las cunvegnas da prestaziun a la totalited da las persunas cun dret da vuscher da tuot las vschinaunchas purtedras.

Las vschinaunchas purtedras correspuondan a las vschinaunchas da fin uossa da la regiun da provedimaint da sandet Engiadin’Ota.

Üna cunvegna da prestaziun vela scu accepteda, sch’ella es gnida appruveda taunt da la pluralited da las vschinaunchas purtedras scu eir da la pluralited da las votantas e dals votants.